Ne, wat ess wiar völl passiert, dat muet ech önk vertellen.
De Kaal woar em Dorpe, em Kuaflangk, un do goff ett an de Feschabteilengk enn Offerte, en gruoten Oktepuss am Stöck.
He kuam nohieme, un leeht miar datt schäbbige Diar in denn Küählschrank. Wie ech vam Doktersch hiem kuam, unn denn Küählschrank open makden, do kiakt mech suan eislech Verzuun aahn. Füar loauter Schreck loot ech en ordentlechen Bölk.
De Kaal woar in de Garasch. Denn hann ech miar ewer raangehollt.
Watt sual ech dann mett sunem Monschtrom, datt kriach ech doch garnett in de Pann. Datt Unekum kannste dir opp de Huatablage vam Ottemobil legen. Dann fährt dir och kianer mehr droppen. Odder donn denn inn de Duodekeste, un begraw en emm Wauld.
De Kaal seet, denn muaste opp dem Dörpel driethollswiek häuen unn in de Pann donn, hä schröümpelt bestemmt noch jett. Dentenfesch sual arch gesongk sinn. Völl Ommegga drei unn kaum Fett.
Kaal, du glaubs doch nech werklech, datt ech met dem Diar opp dem Dörpel gonn unn datt uatschlag wie denn Teppech mim Uutklöpper. Ne, nemm datt kuomesche Diar un vergraw ett. Datt will ech nitt in mianem Küahlschrank hawen. Datt kiekt su bös, dat kann nech schmakken. Ech maak dir hütt en ordentlechen Kröppels opp Schwattbruat.
De Kaal hätt dann denn Ömmemann irgendwo entsorgt. Ieankoopen donn ech nu wiar alleen, befüar där wiar su watt Fieses in die Bude hollt.
Füar loauder Schreck har ech miar uatnohmswieas en Schnäpsken genehmegkt.
Ewwer datt woar ett noch nett alles, watt passiert ess. Wiar woaren iangeloaden bimm Wau opp en 60en Gebuotsdag emm Frielekusen. Mian Kliederschaap quällt öwer mett Kleedasch un Plonten, ewer man hätt nix aan to treken. Unn emmer sind de Brokken to klian, datt muas am Kliederschaap liegen. Ewwer ech han de Lösung för datt Problem. Enn Shapeware Korsett. Suan knappes Diel watt de Wampe wechdrökkt. Die ess jo nitt werklech wech, sondern nur woangersch, wo se nitt stürt.
Ech deit miar, ech loot molls denn Kaal ess dröwer kieaken opp datt parat ess.,
De Kaal kiekt reits un lenks, unn hengen un vüaren, unn seet dann. Joo datt wüard woll gehen, wenn du dann noch datt Korsett do dronger häss, unn du damet noch sitten kanns.
Ech kieak denn aahn unn sach, Kaal ech hann datt Korsett doch schon dronger. Dann bruuk ech jetzt ewer flott watt Geild. Ech gonn namm C & A un geild miar enn nieue Kleddasch. Datt häst du nu davon. Unn en Sahne-Kuaken, nommendags bian Koffe gött ett och nit miar füarens.
Ech holl miar en nieue Kliad un wiar send dann opp denn Gebuotsdag. Noh demm Meddacheeten do woar ett miar opp ienmol drammeg gewoarden, enn rechtege Wallengk. Da holl ech miar uat de Hangkdesche enn Daschenduak um miar de Stiarn awtedrüagen. Opp ienmoll fengen de Kaal un de Wau aan te knietschen. Unn miar woart ett emmer wärmer.
Watt knietscht ihr denn su, ihr seit ja rechtegk flabeseg, ech hann doch nur de Wehßeljoar am jangk, do gütt ett doch nix to knietschen. Doch, seet de Kaal, kiek es womett du dir de Stiarn awgedrüagt häss. Jo mett nem Daschenduak, watt süss. Joo, kiek doch ess. Unn da sinn ech datt. För lauder Ritterraasch har ech anstatt en Daschenduak, enn Schlippeinlage genommen, ne wat woar miar datt wiar schenant. Ewwer datt kömmt davon, wenn ett pressiert.
Bös Strackes, önker Klärchen
eislech (grimmig), Bölk (Schrei), Monschtrom (Monstrum), Duodekeste (Sarg), driethollswiek (windelweich), Kröppels (Panhas), Wau (Walter), füarens (vorerst), drammeg (warm), Wallengk (Wallung), knietschen (laut lachen), flabeseg (albern), Ritterraasch (Hetze, eilig), schenant (peinlich), pressiert (eilig schnell)